林子博x西洋玄學家Benny Mas 英倫延續未了緣

每一期都會透過我感知性的塔羅牌來啟發每一位嘉賓的內心問題和了解他們，從而深入透視他們最新的人生課題以及內心深處的個性和見聞，當然少不了化妝保養心得！今期《靈視美》邀請的嘉賓，正正就是近期話題多多，已移居英國的男藝人、最近成功轉型網上KOL的林子博。

數數手指，林子博是我認識超過15年的藝人朋友，他的太太Shirley更是我早期的「麻雀腳」，所以我和子博一家四口可以說得上是識於微時！很多時候在朋友聚會上都會碰面。多年前，我也曾在不同報章、網媒節目、媒體上訪問過他，我們最後一次見面，就是子博太太Shirley因病離世的時候，之後不久就聽到他們舉家移民英國的消息，然後差不多接近一年多再沒聯絡。最近，我們因為網絡節目再度合作，讓我們更了解彼此間當年的種種。由於身處兩地，每次合作，我們都是隔著電腦屏幕，難得今次子博回港探親，當然要把握機會捉住真人，透過神祕的塔羅牌來深入剖析林子博真實的一面。還有他多年來擔任主持的心得，以及保養秘密！

同樣地，我請子博抽出了三張代表過去、現在、將來的塔羅牌，三張牌分別引導我想起不同的問題。

第一張（過去）：「女祭司」

Benny師傅：「修女、女祭司，意思係學術性、治療、進修、進步空間，從呢張牌令我諗起一個問題，其實你移居英國已經有一段日子，你覺得香港同英國生活有咩大分別？有無令你改變？演藝事業、工作環境始終同香港唔同，有無試過唔適應、喺英國又有無學到新技能？」

子博：「除咗接仔女返學放學做司機之外，我就喺書房工作，大家可能都知道我以往做傳統電視台主持，過咗去英國之後就全職做YouTuber，感覺上都係同一樣嘢，但其實又有好大分別，不過就自己做自己事。最大分別只不過係要跳去用唔同嘅方式或形式去表達，而家接觸粉絲嘅渠道比以前仲直接咗，唔同以前傳統電視台咁多限制，所以收到嘅資訊都係最直接最真實。以前做電視節目，同粉絲交流其實唔係好多，好多時候都要透過經理人又或者隔咗一層咁，到有作品出先會同粉絲有接觸，而且作品都係歸功於電視台，但依家我有自己嘅YouTube頻道，同粉絲多咗直接互動，人同人之間交流多咗，所以隨住唔同年代嘅科技發展，自己都學習咗好多新嘅網絡科技資訊。」

Benny 師傅：咁不如我哋再抽第二張塔羅牌，再了解吓你嘅其他問題吖！

第二張（現在）：「死神」

Benny師傅：「子博，抽到呢張牌係咪好驚喜呢？你試過咁樣嘅訪問形式未？依家就由呢張塔羅牌去閱讀同理解你嘅問題，然後再訪問返你。（陰陰嘴笑）呢張塔羅牌係「死神」，一般坊間嘅傳統理解都係意味著唔好嘅畫面，甚至會令人感到不安，因為佢代表住死亡、結束。但係其實呢張牌真正嘅意思係有重生嘅意思，正正反映出你離開香港過到去英國從頭嚟過，重新生活一樣。既然抽到死神呢張牌，我有一個問題真係好想深入了解一下，我之前喺坊間嘅報道裡面睇到，你話移民過英國，係為咗完成太太Shirley嘅遺願，其實係咪真係咁、定係有其他特別原因？」

子博：「一半一半啦，都係太太嘅一個遺願，其實太太之前係有遺憾，因為太太小時候家庭經濟問題，無辦法俾佢去外國留學讀書，在有限能力之下只可以俾哥哥去外國留學讀書，所以太太一直都有個心願，就係希望去外國讀書。當太太離開後，我自己亦都有好多情緒問題出現，我以為自己可以handle得到，但係其實每日返工放工都係喺同一個地方，你叫我點可以唔觸景傷情？所以當其時有諗過搬屋，但係搬來搬去其實都只會喺返香港，我覺得始終都係解決唔到我嘅情緒問題。就喺呢個時候，我突然間想起我太太生前嘅一個遺憾同願望，我好想去幫佢完成呢個願望，所以就送一對仔女去英國讀書，希望藉此完成太太心願。」

Benny師傅：「我覺得所有事情都係一個緣份，就好似呢張塔羅牌『死神』一樣，意味住重生，我相信你去到英國，既可以幫Shirley完成佢嘅遺願，亦可以重過新生活。咁我哋繼續抽第三張牌。」

第三張（未來）：「愚者」

Benny師傅：「真係好神奇，抽到『死神』牌之後，第三張就抽到『愚者』，正正反映出重新生活，新嘅開始。既然有新嘅開始，我都好想問吓，你過到英國，除咗本身花粉症同比較嚴重，鼻敏感又非常辛苦之外，你都係出名嘅童顏，一把年紀仲算叫做保養得幾好，哈哈哈哈，所以我最想知道，喺唔同天氣同環境情況下，你平時點樣保養肌膚？其實有無咩特別嘅護膚心得可以同我哋啲讀者分享吓？」子博：「美圖囉，哈哈哈哈。其實我比較少化妝，我諗呢個其中一個原因。另外，我相信係英國嘅水土同天氣，仲有食多咗有機、新鮮嘅食物，個人心情放鬆、壓力少咗，啲皮膚自然會好啲。不過，我發現有一樣習慣可能都有幫助，就係以前我從來無機會瞓晏覺（俗稱美容覺），但係依家喺英國多咗好多私人時間，尤其仔女返咗學，我就多咗時間喺下晝瞓覺，所以呢個都係一個好好嘅養生護膚心得。盡量早睡早起，多睡覺！」

後記：今次好開心可以邀請到已經移民英國的林子博，做了一個深入的塔羅牌訪問，透過子博抽出來的塔羅牌，讓我們大家都可以了解他的內心世界更多，讓坊間不實報道即時不攻自破。亦很高興子博跟我們分享了美容覺養生保健法，原來「美容覺真係要喺下晝瞓覺先有效㗎！」所以大家有時間的話，不妨可試試。在此我祝福林子博返回英國之後，可以繼續他的YouTube頻道，收看率爆燈，愈來愈多粉絲支持，亦都希望一對仔女學有所成，大學畢業，可以完成太太Shirley的心願，祝福你們。